За предвреме родените бебиња најважни се редовните контроли

Предвремено родено дете се смета бебе кое е родено пред навршување на 37 гестациски недели. Секоја година околу 1 од 10 бебиња е родено пред време. Тие најчесто не се развиени во потполност, можат да имаат голем број здравствени проблеми и да имаат потреба од продолжен престој во болница. Благодарение на развојот во медицината, и бебињата кои се родени многу пред време имаат големи шанси за преживување. Во зависност од неделата во која се родени, овие бебиња се делат во неколку групи.

– деца родени помеѓу 34 и 36 недела од бременоста

-деца родени помеѓу 32 и 34 недела од бременоста

– деца родени пред 32та недела од бременоста

– екстремно предвреме родени деца, пред или во 25та недела од бременоста

Некои здравствени проблеми кај овие деца може да се присутни цел живот. Некои пак, како интелектуални или развојни недостатоци, се појавуваат подоцна во детството. Овие недостатоци се манифестираат со задоцнет физички развој, потешкотии во учењето, во комуникацијата и сл. Колку порано бебето е родено, толку се поголеми можностите за здравствени проблеми. Најчесто овие деца остануваат хоспитализирани се додека нивните органи не се развијат во целост, или барем доволно за да можат да опстојуваат без медицински апарати. Некои од нив остануваат во болница со недели или месеци, сè додека почнат да дишат самостојно,  да се хранат преку уста и да ја одржуваат телесната тежина.

Предвремено роденото дете веројатно ќе има потреба од медицинска поддршка дури и од како ќе ја напушти болницата. Болничкиот персонал ги подготвува родителите како да се грижат за бебето дома, а тие треба да го носат бебето на редовни контроли и проверки.