Некои однесувања на детето, едноставно не смеете да ги толерирате

Без разлика дали воспитувате енергично дете или имате работа со дете со силна волја, постојат одредени проблеми во однесувањето на детето кои се вообичаени во еден или друг момент. Начинот на кој реагирате на овие проблеми игра голема улога во тоа колку е веројатно вашето дете да ги повтори во иднина.

Лажење

Постојат три главни причини зошто децата лажат: да привлечат внимание, да избегнат неволја и да се чувствуваат подобро за себе.

Кога ќе го фатите вашето дете во лага, прашајте: „Дали тоа навистина се случило или посакуваше да се случи?“ . Нагласете ја важноста на чесноста со создавање правило во семејството кое вели: „Кажи ја вистината“.

Пофалете го вашето дете кога ќе ја каже вистината – особено кога вистината може да го доведе во неволја. На пример и покрај вашата забрана детето изело колаче пред вечерата, и ви го признава тоа. Вие можете да му кажете „Горда сум на тебе што си искрен. Сепак, денес нема да смееш да играш видео игра, но, бидејќи ми ја кажа вистината утре нема да важи казната .“

Пркос

Дали вашето дете ве игнорира кога ќе му кажете да ги собере своите играчки или ќе рече „Не!“ кога ќе му кажете да престане да удира со играчка на подот? Пркосот е нормално однесување на  децата со кое ги тестираат на родителите.

Кога вашето дете е пркосно, понудете договор.  „Кога ќе ги собереш играчките, тогаш ќе можеш да гледаш телевизија“.

Ако се побуни, тогаш предупредете го дека ќе мора да се соочи со посериозни последици. И бидете доследни, само така ќе го научите детето прво да слуша пред да прозбори.

Премногу време пред екранот

Друг чест проблем со однесувањето на детето е отпорот при ограничувањата на времето поминато пред екранот. Без разлика дали вашето дете вреска кога ќе му кажете да го исклучи телевизорот или игра видео игри на вашиот мобилен телефон секогаш кога не гледате, премногу време пред екран не е здраво.

Воспоставете јасни правила за времето поминато пред екранот. Ако вашето дете стане премногу зависно од електрониката за забава, уште повеќе намалете го времето кое ќе го поминува пред екранот.

Покажете му и со пример. Одредете семејно време кога никој дома нема да смее да користи електорнски уреди или да гледа телевизија. А тоа време поминете го заедно во некои интересни активности.

Проблеми поврзани со храната

Можеби имате работа со пребирлив јадач. Или можеби вашето дете тврди дека е гладно на секои 10 минути или постојано нешто грицка. Ваквото однесување  може да доведе до проблеми со здравјето и телесниот изглед, па затоа е важно како ќе му пристапите на овој проблем.

Избегнувајте да кажувате работи како „зеленчукот е здрав“. Децата имаат тенденција да мислат дека здравата храна има лош вкус. Наместо тоа, зборувајте за тоа колку е вкусен зеленчукот и другата хранлива храна и поставете ограничувања за грицките.

Агресивност

Вашето дете ја фрла книгата по математика, затоа што не може да ја заврши домашната задача. Или го удира братчето кога нешто се караат.

Некои деца стануваат агресивни затоа што не знаат да решат одредена ситуација на соодветен начин. Други се перфекционисти кои не можат да поднесат ако нешто не оди онака како што тие планирале.

Агресивното однесување е нормално кај малите деца до претшколска возраст. Но, агресијата  може со тек на време да прогресира и детето од неа да научи други вештини.

Секој пат кога ќе биде агресивно детето, тоа соодветно казнете го. Одземете му некои привилегии и сериозно поразговарајте  да сфати што направило, ако  со својата агресивност повредило некое друго дете. Доколку ова не вроди со плод, побарајте стручна помош.