Законски измени за посвојување деца
Собраниската Комисија за труд и социјална политика на денешната седница ги разгледуваше измените и дополнувања на Законот за семејство, во скратена постапка, со кои треба да се отстранат недостатоците во постојните законски решенија во делот на посвојувањето на деца.
– Со измените и дополнувањата се утврдуваат рокови во постапката што се води пред центрите за социјална работа, до уписот на посвоителите и посвоениците во регистарот на можни посвоители и посвоеници и глоби за непочитување на роковите, се формира нова Комисија за оцена на здравствената состојба на децата без родители и родителска грижа, а се воспоставува единствена листа на најсоодветни посвоители за територијата на Република Македонија, односно избор на посвоител по електронски пат, при што нема да се земе во предвид местото на живеење на посвоителот и посвоеникот – истакна во образложението министерот за труд и социјална политика Спиро Ристовски.
Измените со утрвдување на роковите во постапувањето на надлежните институции треба да овозможат да не се одолжува постапката на посвојувањето. Новата лекарска комисија ќе ја оценува и утврдува здравствената состојба согласно нови категоризации, со оглед на тоа што старите биле ригорозни и како здрави деца ги регистрирале само оние со 100 отсто добар психомоторен развој, што придонело да биде помал бројот на здрави деца за посвојување.
Министерот Ристовски истакна оти со измените се воведува и единствен регистар на посвоители и посвоеници на територијата на Македонија, затоа што, рече, воопшто не е важно од каде се посвоителите или детето, туку оти во процесот на посвојување е важно да се направи избор најдобар и најсоодветен на детето.
Пратениците од опозицијата сметаат дека измените се потребни со цел да се надминат неправилностите во процесот во минантото, но дека доколку имало пропусти или кршење на законите во минатото некој треба да сноси и одговорност.
– Согласно она што беше утврдено во истрагата и она што беше докажано, рече министерот Ристовски, е санкционирано. Нашата цел, додаде, е да се спречат неправилности во иднина и децата посвоеници брзо и во транспарентна постапка да им биде најден соодветен дом.
Дел од опозицијата сметаше дека рокот од една година што им се дава на биолошките родители да го земат назад своето дете откако ќе го дадат во дом е долг. Можеби, рече министерот и додаде дека сепак мисли оти ним со стручна помош треба да им се даде шанса да си го добијат детето назад. – Доколу рокот прави проблем во постапката на посвојување може да се скрати во иднина, рече министерот Ристовски
