Двојките со женски деца почесто се разведуваат
Жените кои имаат ќерки почесто бараат развод, бидејќи девојчињата се и помош во домот. Мажите не сакаат синовите да им растат без татко, па двојките со машки деца опстануваат подолго. Тоа го тврдат американските научници. И не само што нивното истражување покажало дека двојките кои имаат машко дете почесто остануваат заедно, туку и немажените жени кои носат син имаат поголеми шанси за венчавки. Разведените мајки на девојчиња имаат помали шанси за повторна мажачка и останување во брак од оние кои имаат синови.
Истражувачите проучувале податоци од три милиони возрасни Американци и откриле дека почесто се разведуваат двојките на кои првороденото им е женско. Факторот развод пораснал за десет проценти во случаите кога двојката имала три ќерки, но научниците не откриле зошто девојчињата „лошо“ влијаат на бракот.
Психолозите сугерираат дека девојчињата им даваат сила и поттик на мајките да излезат од лошиот брак, наместо очајнички да се обидуваат да спасат лоша врска.
Резултатите од истражувањето покажуваат дека на мажите самата институција брак им се чини поатрактивна ако прво добијат син. Исто така повеќе вложуваат во бракот и не сакаат синот да им расте без татко.
Податоците покажуваат дека во САД дури 73 % разводи ги иницираат жените, што фрла поинакво светло на мотивите на мажите кои решаваат да останат со своето семејство. Жените кои имаат ќерки почесто бараат развод, бидејќи девојчињата се и помош во куќата. Во тоа веројатно се крие и причината зошто разведените жени со ќерки поретко повторно се мажат. Повеќето со своите ќерки наоѓаат социјална поддршка и друштво, па имаат помала потреба за влегување во брак.
