Рак на јајчници – не ги игнорирајте малите симптоми

Жените често ја игнорираат непријатната болка во пределот на стомакот или карлицата или овие симптоми ги поврзуваат со менструални, вознемирен стомак и слично. Но, кога станува збор за рак на јајчниците, тие мали грчеви понекогаш се единствени предупредувања.

Јајчниците се два органи со овална форма, во кои се создаваат и при овулација се ослободуваат јајце- клетките. Тие се поврзани преку јајцеводите со матката, а големината варира од приближно три сантиметри за време на репродуктивните години, до помалку од два сантиметри во менопаузата. Ракот на овие органи се јавува кога абнормални клетки растат неконтролирано, што е пропратено  со симптоми кои не исчезнуваат иако го менувате начинот на живот, односно ако ја смените исхраната, почнете да вежбате или повеќе одморате. Некои вообичаени симптоми се:

– Надуеност и зголемен абдоминален обем

– Карлична или абдоминална болка или притисок што не се повлекува по менструацијата

– Намален апетит или брзо чувство на ситост

– Уринарни симптоми како што се итност или зачестеност

– Менструални промени или абнормално крварење

– Промена во навиките на дебелото црево или наизменична дијареа и запек

– Болка за време на секс

Ако постојано чувствувате еден или повеќе од овие симптоми, треба да закажете преглед кај  вашиот гинеколог. Препознавањето на знаците за рак на јајчниците може да биде тешко, но свесноста за факторите на ризик може да биде првиот чекор во откривање на оваа болест. Фактори на ризик за рак на јајниците вклучуваат:

– Ризикот од рак на јајчниците се зголемува со возраста. Најчест кај жените 50-65 години, но може да се дијагностицира и кај помлади жени.

– Жените кои никогаш не забремениле имаат поголем ризик од заболување.

– Жените кои користат орални контрацептивни средства имаат помал ризик од рак на јајчниците – при што придобивките се забележуваат по само 3-6 месеци употреба. Апчето за контрацепција ја инхибира овулацијата што е заштитен механизам.

– Семејната историја за заболување од рак на јајчниците, дојката или матката, особено кај роднините од прв степен (родители, браќа и сестри) или низ многу генерации може да го зголеми ризикот.

– Жените кои имаат вишок телесна тежина имаат поголем ризик да заболат од рак на јајчниците.

Сепак секоја жена најдобро го познава своето тело – само треба да го следите својот инстинкт и ако се посомневате во нешто, да поразговарате со својот гинеколог.