Малала работи на нова книга
Добитничката на Нобелова награда Малала Јусафзаи работи на својата најнова книга со мемоари. Младата активистка од Пакистан е позната во светот по нејзината борба за едукација на девојчиња, како и по тоа што како тинејџерка преживеа обид за убиство од страна на Tалибанците.
Едно од претходните дела на Јусафзаи е книгата “Јас сум Малала – Приказна за девојката која се бореше за образование а беше застрелана од Tалибанците”. Ова дело кое е објавено во 2013 година е продадено во милионски тираж, а Малала ја доби Нобеловата награда за мир една година подоцна, на своја 17 годишна возраст. Оттогаш таа успеа да дипломира на Универзитетот во Оксфорд, и се венча со Асер Малик, менаџер на Пакистанскиот крикет сојуз. Нејзината продуцентска компанија „Екстрацирикулар“ има договор со телевизијата Apple TV +, за емитување на широк спектар од филмови и телевизиски проекти.
– Последните неколку години од мојот живот доживеав извонредна трансформација, пропратена со многу болка, но и радост. Во оваа книга најмногу се откривам себеси досега и се надевам дека мојата приказна ќе им стане многу поприфатлива на читателите – изјави Малала.
Критичарите ја нарекуваат оваа книга “воодушевувачка приказна за закрепнувањето и потрагата по идентитет, и за животот пред очите на јавноста”. Од ова дело предвидени се и изданија за млади читатели, како и едиција на сликовници.
