Проблемите со спиењето не минуваат лесно

Кога ќе се роди ново бебе, секој родител се соочува со главниот проблем – спиење. Некој повеќе, некој помалку и често наидувате на совети од типот – типично е тоа, ќе се среди со тек на време. Но според најновите студии, ова не е баш точно.

Според истражувањата направени во детскиот оддел од Медицинскиот центар во Охајо, проблемите од најрана возраст продолжуваат потоа и со тек на годините. Во истражувањето учествувале мајки и деца кои се набљудувани на возраст од 6, 12, 24 и 36 месеци. Ако децата во тек на првото набљудување немале проблеми со спиењето ги немале ни подоцна, но третина од оние кои ги имале проблемите, не успеале да ги решат ни до последното набљудување. Сепак забележано е дека како растат децата, така типот на проблемот се менува. До две години најчест проблем бил како да се заспие и да се спие цела вечер, додека на три години во повеќето случаи проблем била појавата на кошмари и немирно спиење.

„Спиењето мора да биде приоритет за целото семејство. Родителите мора да инсистираат на рутина пред спиењето и будење секогаш во исто време, за да децата стекнат добри навики за спиење„ се наведува во студијата, објавена во списанието „Педијатрија„.