Неверојатните способности на бебешкиот мозок

Бебињата можеби се малечки, бучни и бараат внимание. Тие не знаат што се случува околу нив, ниту можат да учествуваат во било каква активност, но, сепак тие се многу попаметни отколку што мислиме.

Нивните неверојатни способности постојано ги предизвикуваат научниците да истражуваат.

Така научниците откриле нов начин како да го измерат квантитетот на способностите кај бебињата и нивните откритија се повеќе од неверојатни.

Бебето знае кој е „главен“

Според резултатите објавени во јануари 2011 година, во едно научно списание бебињата ја разбирале социјалната хиерархија и знаеле дека големината одредува кој е главен. На 10 месеци тие знаат дека „голем“ значи главен.

Бебињата разбираат емоции и расположенија

Вашето бебе е мини емпат. Тоа може да почувствува кога сте среќни, тажни или дури кога расположението ви е пола-пола. На пет месеци бебето може да разликува весели од депресивни звуци.

Бебињата ги сфаќаат емоциите на кучињата

Вашето бебе пред да каже „мма“ или „тато“, може да ги сфати емоциите на кучињата. Да токму така, кучињата. Во една студија изведена во 2009 година, било забележено како шест месечно бебе ги поврзува звукот на бесно ржење или пријателско лаење со фотографии на кои се прикажани кучињата во различни ставови со телото.

Бебињата се родени танчери

Во друга студија обавена во научно списание во 2010 година, било објаснето дека бебињата имаат природна способност за танц, а научниците не биле сигурни зошто и како таа се развива. Научниците пуштале снимки од класична музика, ритмични мелодии и зборување, додека ги снимале реакциите на бебињата. Тие се движеле со рацете, нозете, стапалата, торзото и главата додека ја слушале музиката, за разлика кога го слушале зборувањето.

Бебињата можат да учат додека спијат

Истата година во друга студија научниците откриле дека бебињата можат да учат додека спијат. Во експриментот биле вклучени 26 бебиња ( секое старо 1- 2 дена), научниците им пуштале музички тон пропратен со кратко дување воздух кон очите, околу 200 пати во тек на половина час. Бебињата имале и поврзана мрежа од 124 електроди на главата и лицето, преку која се регистрирала мозочната активност. Бебињата брзо сфатиле дека по музичкиот тон следи краток бран од воздух, па ги затворале очите. Бидејќи новороденчињата го поминуваат поголем дел од времето во спиење, оваа новооткриена способност може да е круцијална за новороденчињата и нивното брзо адаптирање на светот околу нив, со цел да си го осигураат својот опстанок.