Нега и грижа за здрави стапала

Кога размислуваме за грижата за здравјето, стапалата ретко кому му се приоритет. Обично мислиме дека тие долго ќе бидат здрави со редовна хигиена, но тоа не е секогаш доволно – на стапалата многу влијаат и (не) квалитетот и (не)удобноста на чевлите, начинот на живот како и телесната тежина

Хигиена

Хигиената на стапалата најдобро се одржува ако секое утро облечете чисти чорапи на свежо измиени и исушени стапала. Тврдата кожа повремено треба да се отстрани. Ноктите треба редовно да ги сечете, но на умерена должина, без навлегување во месото, (можете да предизвикате инфекција т.н враснување на ноктот).

Квалитет на обувките

Ако обувките се неудобни, сигурно се и неквалитетни, а тоа значи дека не смеете да носите претерано високи потпеици (без разлика што некои жени го тврдат спротивното). Секако, понекогаш на модата и естетиката треба да им се даде предност, но само на неколку часа и повремено. Секојдневното носење високи потпетици непотребно ги оптеретува стапалата, бидејќи нашето тело не е градено така да без последици ја носи нашата тежина на стапалата поставени под стрмен агол и потпрени воглавно на прстите и предниот дел од стапалата. Квалитетната распределенот на оптеретувањето меѓу прстите и стапалото, е многу важно, па најудобно ќе ви биде во чевли со потпетица не повисока од 3 – 4 сантиметри.

Животни навики

На хигиената и добрите обувки додајте им ги општите совети за здрав живот (умерена и редовна телесна активност, правилна исхрана и одржување на умерена телесна тежина) и веќе сте направиле многу за своите стапала. Но, тоа нема да биде доволно за оние кои многу стојат, особено ако имаат зголемена телесна тежина. Долготрајното стоење е големо оптеретување, па стапалата попуштаат и се деформираат. Ако не можете да избегнете повеќечасовно стоење, секако јавете се кај ортопед. Кога можете, барем накусо седнете, односно обидете се повремено да ја растеретите едната, па другата нога, т.е често менувајте ја положбата во која стоите. Правилното држење на телото подеднакво е важно и за карлицата и стапалата.

Рамни (спуштени) стапала

Ова е честа дијагноза која многу е поврзана со квалитетот на обувките и начинот на живот. Кај нормалното здраво стапало, сводот е повисок, па изразито рамното (или спуштено) стапало ќе го препознае и лаик со гледање на отпечаток од стапалото. Но, и ако мислите дека немате рамни стапала, а живеете типично градски живот, ви советуваме да повремено посетите ортопед, особено ако чувствувате болки во стапалата. Тој ќе открие и малку рамни стапала, што лаик може да не ги забележи. Раната интервенција ќе ги сочува стапалата од понатамошни деформации. Многу помагаат ортопедски влошки или обувки, како и посебни вежби за зајакнување на мускулите на стапалата.

„Атлетско стапало“ и други габични инфекции

Габичните инфекции се најчестата кожна болест, што не е невообичаено бидејќи габичките се размножуваат секаде каде што е влажно, темно и топло. Оттука и називот – „атлетско стапало“ – спортистите и личностите кои многу се потат, најлесно се заразуваат. Габичките може лесно да се пренесат со допир на заразено ткиво или предмет. Средствата против габички можат да се купат во аптеки, без лекарски рецепт, но ако инфекцијата не минува, треба да побарате лекарски совет.

Жуљеви и плускавци

Овие проблеми се последица на триење од чевлите и кожата (при тесни и неудобни чевли, но и при потење). Плускавците обично настануваат на места каде кожата е најтенка, болни се, но и брзо минуваат. Иако жуљевите знаат да почнат како плускавци, изгледаат сосема поинаку и се препознаваат како тврдо задебелување на кожата. Чести се на испакнатите делови од стапалото – зглобивите од прстите и петиците. Повеќето луѓе на почеток ќе забележат црвени и малку болни површини. Како кожата станува тврда, обично некое време не боли, но кога ќе стане многу тврда и дебела, влегува се подлабоко и почнува да ги притиска нервите, што може да биде многу болно. Се отстрануваат хемиски и механички, а потоа најдобро е кожата да се навлажни, за да омекне.

Од сето наведено, видливо е дека најзагрозени се личностите кои повеќе се потат. Без разлика дали тоа е поради склоност или начин на живот (спорт, тешка физичка работа) им се препорачува да не останат само на хигиена, туку превентивно да посетат ортопед и дерматолог.