Бременост и инфекции

Ако сте бремени, присуството на одредена инфекција може да биде проблем, не само за вас. Некои од нив можат да бидат опасни за здравјето на вашето бебе. Секако најважно е да се потрудите да не дојде до тоа, а може да се успее акo ги почитувате основните принципи за превенција од појава на овие несакани состојби во текот на вашата бременост.

Кои се основните превентивни мерки до кои треба да се придржувате?

1. Не јадете месо кое не е доволно долго готвеои на доволно висока температура, без разлика на кој начин е приготвено.

2. Не делете храна, пијалоци со други лица, особено не прибор за јадење.

3. Почесто миете ги рацете, посебно ако работите со деца (градинки, училишта), по секој оброк или спремање на истиот, по одење во тоалет, промена на пелени и по одење во тоалет ако имате мало дете, по исфрлање ѓубре или допир со валкани алишта, по допир со било кое животно.

4. Не доаѓајте во допир со мачки, особено со нивниот измет.

5. При работа во градина најдобро работете со ракавици и повторно измијте ги рацете потоа.

6. Заштитете се од убод од инсекти – комарци со носење облека која го покрива целото тело, особено ако патувате во ризични подрачја. Сепак најдобро е да избегнувате патување во земји со висок ризик од инфективни заболувања – полио, жолта треска, маларија.

7. Користете кондом.

8. Имунизација во фамилијата – ако членовите на потесното семејство се имунизирани, мала е можноста да се заразат и да ја пренесат инфекцијата на вас, посебно доколку вие не сте вакцинирани. Во случај да сте ги примиле сите вакцини во детска возраст, можноста да се заразите во текот на бременоста е скоро никаква.

Сепак, во бременоста може да дојде до појава на инфекции од различни причинители, со различен потенцијал да ви наштетат вас и на вашето бебе и истите да бараат лекување со одредени антибиотици. Се одбираат исклучиво по антибиограм, без штетно влијание на плодот. Некои од инфекциите даваат одредени симптоми, но некои се асимптоматски, што ги прави поопасни. Со цел да не се дозволи присуството на одреден предизвикувач на инфекција да направи штета во текот на бременоста, правовремениот скрининг е начин тоа да се избегне.

Што значи скрининг на инфекции во бременостa?

Скринингот на инфекции подразбира постапки на одреден временски период, со цел навремено откривање на било кој предизвикувач на истите, адекватен третман со што се спречува штетното влијание на мајката и плодот.

1. Редовно земање микробиолошки брисеви. Се земаат четири бриса:

– брис од цервикс

– брис од вагина

– брис за кламидија и

– брис за микоплазма/уреаплазма.

Периодот кога се земаат овие брисеви, оди по следниот редослед:

– 12 гестациска недела (по завршена ембриогенеза на плодот)

– 28 – 32 гестациска недела и

– 36 гестациска недела (г.н.)

Ова важи само во случај кога сите анализи се негативни. Ако се добие позитивен наод, инфекцијата се лекува и земањето на брисот се повторува по завршување на терапијата за потврда на излечена инфекција со негативен резултат. Ако забележите засилен вагинален секрет во меѓувреме и покрај негативниот наод на последниот брис, кажете му на вашиот гинеколог и брисот се зема веднаш, пред предвидениот временски термин.

2. Уринокултура – 12 – 16 г.н. Посебно е важна поради можноста да имате асимптоматска бактериурија – присутна инфекција која не дава симптоми (урината е нормално стерилна) и истата понатаму да прогредира во акутен цистит (воспаление на бешика) во 30% случаи или во пијеноленефрит (воспаление на бубрез) во 50% случаи. Тие две состојби се веќе ризични како за вас така и за вашето бебе.

3. Брис за ГБС (група Б стрептококи), 36-38 г.н.

Доколку вие и вашиот гинеколог се придржувате до горенаведеното, а вие на време алармирате за секоја промена или симптом кој ќе се појави во текот на вашата бременост, мала е веројатноста инфекција во бременоста да биде причина за било каков ризик за вас или вашето бебе.