Со мали трикови избегнете ги најчестите грешки во готвењето

Подготовката на вкусен семеен оброк или вечера за пријателите, може да биде одлично искуство, а токму храната е вистински повод за дружење. Но една грешка е доволна да го расипе цело јадење, а малите грешки кои можат сè да расипат, се случуваат во најнеочекуваните ситуации.

Пред да почнете да готвите проверете ги сите состојки и внимавајте на рокот на траење. Ако ви се случи да заборавите нешто или да додадете погрешни состојки тоа е најчесто затоа што претходно не сте ги подготвиле сите потребни состојки. Покрај тоа можно е да ви се случи во тек на готвењето да го отворите фрижидерот и да сфатите дека токму најважната состојка ви фали. Затоа следен пат на кујнскиот пулт ставете ги сите состојки кои ви требаат, а тоа воедно ќе ви овозможи поголема ефективност во готвењето.

Тавата за пржење ја преполнувате
Колку и да се трудите, прженото месо не е вкусно. Причината може да биде токму во преполнување на тавата. Имено, при пржење (и печење) храната испушта влага, а ако се обидувате да ја зготвите во преполна тава, месото ќе се динста на пареа, наместо да се пржи. За да го избегнете тоа, ако немате доволно голема тава, подобро е да го готвите на повеќе пати или да користите две тавчиња. Истото важи и за печено месо.
Покрај тоа уште една прична печеното месо да не е доволно вкусно, може да биде недоволно загреаната тепсија. За да добиете вкусно и убаво испечено месо, прво загрејте ја тепсијата, внимателно додајте доволно масло, па откако тоа ќе се загрее, полека спуштете го месото. Корисен совет е месото пред печење да го ставите на кујнска хартија, за да се впие вишокот вода и да се спречи прскање при печење. Уште еден совет е да го одмрзнете месото пред подготовка и да отстои малку на собна температура. Не користете смрзнато или многу ладно месо. Така однадвор ќе биде добро испечено, а внатре ќе остане живо. Ова важи и за риба.

Користите стари состојки
Откако ќе потрошите само половина од зачинот за готвење, другата половина сигурно ќе ја складирате во фиока, а токму тоа може да ви го расипе специјалитетот. Имено користењето многу стари зачини и суви зачински билки на храната ќе ѝ даде чуден вкус. Сушените зачински билки препорачливо е да се чуваат шест месеци, не подолго, бидејќи потоа го губат вкусот. Покрај тоа, избегнувајте користење на исушен кашкавал и остатоци од одамна отворено вино. Таквите состојки ќе го расипат и најубавиот рецепт. Ако ви е жал да фрлате храна, дури и зачини, почнете да купувате мали пакувања, откако претходните ќе ги потрошите до крај.

Состојките за колачи не ги мерите пред готвење
Ако се прашувате како тоа еднаш колачите се супер меки и вкусни, а следен пат кршливи и цврсти, тоа е бидејќи не ги мерите на вага состојките потребни за нивна подготовка. Мерењето на суви состојки за приготвување колачи е единствен начин тие секогаш да бидат добри, бидејќи филџан брашно може да варира и до пет грама. Најдобрата алатка која ви треба е кујнската вага. Исто така внимавајте со прашокот за печиво, кој не смее да има изминат рок. Прашокот за печиво би требало да се чува на ладно и суво место, каде може да издржи 3-6 месеци. Ако е постар, постои опасност тестото да не нарасне.