Најчесто цистите не даваат никакви симптоми и се откриваат при рутински ултразвучен преглед
Најголем дел од жените ќе се сретнат со некој вид цистична промена на јајчникот во одреден период од својот живот, без да почувствуваат одредени симптоми. Најчести се функционалните цисти кои се создаваат како последица на нарушување на нормалните циклични промени во јајчниците и во овулацијата. Настануваат доколку нормалните фоликули не успеат да прснат во текот на овулацијата, при што течноста останува и фоликулот продолжува да расте, со што настанува перзистентна фоликуларна циста. Според стручните лица тие вообичаено исчезнуваат без никаков третман за неколку недели до неколку месеци.
Освен нив постојат и:
Ендометриотични или чоколадни цисти – Ендометриозата на јајниците значи постоење на ендометриум во самиот јајник (дел од матката кој циклично се менува во тек на еден менструален циклус) и во тек на мензис крвари во самиот јајник. Со тек на време добива темно-црвена (кафеава) боја и затоа овие цисти се нарекуваат и чоколадни. Жените што имаат ендометриоза може да имаат проблем со забременување, хронични болки во долниот дел од стомакот поврзани со менструалниот циклус, како и болки при сексуален однос.
Дермоидни цисти – Претставуваат едни од најчестите тумори кои се јавуваат кај помлади пациентки и содржат ткива од други делови на телото, на пример коска, коса, ’рскавица во цистичната структура на јајчникот.
Неопластични цисти на јајчниците – израснуваат од несоодветен, прекумерен и неконтролиран раст на клетките на јајчникот. Малигните неоплазми може да се формираат од сите типови клетки на јајчникот, но најчести се од површниот епител. Понекогаш може промената на јајчникот да е последица и на метастаза од тумор кој потекнува од друг орган.
Полицистичен синдром на јајчникот – Ова е едно од најчестите хормонални нарушувања кај жената. Дијагнозата се поставува при ултразвучна детекција на јајчник, обично е поголем од нормалниот, со многу мали фоликули, обично повеќе од 12 на јајчник. Кај овие жени освен присуството на цистите, присутни се и хормонални нарушувања, нередовни менструални крвавења, знаци на зголемена продукција на андрогени хормони (појава на акни, масна кожа, зголемена влакнетост), отсуство на овулации, неплодност, дијабетес.
Симптоми и дијагноза
Најчесто цистите не даваат никакви симптоми и се откриваат при рутински ултразвучен преглед. Кај оние што имаат симптоми, во зависност од нив може да се ориентираме за каков тип на промена станува збор. Циклична болка поврзана со менструацијата обично нè насочува на ендометриоза. Остра и силна болка, кој се јавува одеднаш, укажува на прскање на цистата или на нејзино увртување. Ако постојат поголеми цистични формации, може да се појават и симптоми од околните органи на кои притиска цистата и да се појават проблеми со мокрењето доколку цистата притиска на мочниот меур, но и проблеми со празнењето на цревата доколку цистата притиска на дебелото црево. Во понатамошните иследувања се вклучуваат: туморски маркери, компјутерска томографија, магнетна резонанца и тест за бременост доколку постои сомневање за бременост надвор од матката.
Третмани на цистите
Конзервативен – Поради тоа што функционалните цисти се најчестите не претставуваат закана за здравјето на пациентката и вообичаено самите исчезнуваат, третман на овие цисти ретко кога е потребен. Потребно е нивно ултразвучно следење и евентуално хормонска терапија за да се регулира менструалниот циклус и да се превенира формирањето перзистентни фоликуларни цисти.
Оперативен – Во болница се прави лапароскопска операција низ мали отвори од 5 до 10 мм на стомакот на пациентката се влегува во стомачната празнина со камера и директно се визуализираат органите. Во текот на овој преглед се прави процена на цистата, на јајчниците и на другите органи, по што со микрохируршки инструменти цистата се отстранува, а отстранетото ткиво потоа се анализира и се одредуваат видот на цистата, степенот на болеста и потребата од евентуален понатамошен третман. Доколку станува збор за големи малигни промени, се пристапува кон класичен оперативен пристап.
