Зошто доењето е добро за вас и вашето бебе?

Секако дека доењето е добро и за мајката и за бебето, но изборот дали ќе дои или не, е личен на секоја жена. Важно е сите мајки да сфатат дека искуството со доењето е единствено, односно нема две исти мајки и две исти бебиња.

Според научните докази освен што доењето создава една посебна врска меѓу мајката и бебето, тоа сè уште е најдобриот начин за оптимално хранење и обезбедување долгорочни здравствени придобивки за вашето бебе. Уште една предност е што помага да си ја вратите телесната тежина, тоа е и еколошко.

Во првите неколку дена по раѓањето, вашето тело ја произведува првата храна за бебето, колострумот, кој се произведува во мали количини, но има висока хранлива вредност. Колострумот и зрелото мајчино млеко содржат антитела, добри бактерии и други состојки кои помагаат да се намали ризикот од инфекции кај бебето. Интересно е тоа што мајчиното млеко се прилагодува на променливите потреби на бебето, односно на неговиот напредок и потреби за доење кои со растењето се намалуваат. Забележано е дека лактозата е поприсутна во првичното млеко, а повеќе хранливи материи богати со добри масти има во подоцнежното млеко.

Новороденчето во првите недели од животот често се храни и многу спие, поради што може да пие и лесно да вари само мали количини млеко. Честото доење помага да се воспостави вашиот режим на подои, да се задоволат нутритивните потреби на вашето бебе, истовремено обезбедувајќи посебен начин на поврзување и приврзаност.

Во овој период важно е да водите грижа за вашите гради. Ако забележите дека се црвени, многу зголемени и чувствувате болка, побарајте помош од стручно лице, затоа што е можно да развивате маститис.

Кога го доите бебето треба да бидете во опуштена состојба и да ви е пријатно. Ако имате големи гради, под нив ставете свиткан пешкир за да ги држи во положба која на бебето ќе му е пријатна за цицање. Доколку ви е попријатно можете и да легнете, па да го доите бебето. Најважно е двајцата да уживате во тоа, затоа секогаш изберете мирна атмосфера, во посебна соба.

Подоцна кога ќе потпорасне бебето, ако решите да преминете на вештачко млеко, најдобро е да изберете во кој оброк ќе му го давате вештачкото млеко на бебето. Тоа може да биде првото хранење наутро или пак оброк навечер, кога бебето е поспано и полесно ќе биде да му го замените мајчиното млеко со вештачко. Она што е најважно во ова ситуација е дека за бебетое повкусно кога млекото е малку потопло од собната температура, но не премногу топло, бидејќи тоа ќе го забрза протокот на млеко низ цуцлата и ќе го тера бебето побрзо да голта, што ќе го направи нервозно.

Вашиот партнер или некој друг член на семејството може да биде поуспешен во првичното воведувањето на пиењето млеко од шише и постепено започнување на процесот на одвикнување од цицање. Особено преку ноќ.