Циркуларен кариес

Детето на возраст од две години ги има сите млечни заби и најчеста дилема на родителите е што да сторат доколку се појави циркуларен кариес или т.н. „кариес од шишенце„.Тоа е специфичен облик кариес на млечните заби, кој се јавува во првите години од животот. Ги зафаќа сите заби и доведува до нивно разорување во најраното доба.

Непосредно по никнувањето на горните предни заби, во вратниот дел од забот се таложат меки наслаги под кои се забележува кредестата боја на глеѓта. Набрзо доаѓа до создавање на помали кавитети кои се спојуваат во широки кавитети, кружно околу забот и така доведуваат до отворање на кавумот од пулпата и одвојување на круничката од забот. Кариесот се шири кружно, зафаќајќи ја круната на забот по целата површина, поради што и има добиено назив „циркуларен кариес„.

 

Како настанува?

Главен причинител се рафинираните јаглени хидрати кои се составен дел од голем број секојдневни животни намирници, но и составен дел од сите слатки. Честите дневни и ноќни оброци, особено лошата навика да заспива детето и да се храни навечер преку шишенце со засладена вода, чај, сок или млеко.

Како да се спречи?

На детето при заспивањето не смее да му се остави подолго време шишенцето со течност во која има шеќер туку да му се даде вода или незасладен чај. Исто така земањето салтки да биде врзано за главните оброци, за да пуферскиот систем од плунката се избори со зоните на јака киселост, бидејќи кога детето во тек на целиот ден нешто грицка, пуферскиот систем од плунката се исцрпува и неговиот антикариоген ефект слабее.

Терапија на циркуларен кариес

Терапијата на циркуларниот кариес е сложена и комплицирана, а забите во понапреден стадиум не е можно да се излечат. Циркуларниот кариес брзо напредува и за кратко време, забите се црни и срамнети со непцето. Најтежок дел еда се убедат родителите да ги корегираат лошите навики и режимот на исхрана. Редовното и правилно одржување орална хигиена, редовна примена на флуориди, конзервативно згрижување на кариесните лезии, вадење на млечните заби кои не можат да се санираат и на крај протетско згрижување.

Поправка или вадење

Млечниот заб има иста функција како и постојаниот заб. Поради тоа неговата привременост во детската уста не смее да се обезвредни. Покрај тоа што обезбедуваат нормална фукнција на џвакањето, млечните заби се важни стимулатори за нормален раст и развој на вилицата. Запчињата треба да се поправаат, а не веднаш да се вадат, бидејќи се важни за зачувување на просторот на идните постојани заби.