Облека за миленици – потреба или каприц на сопствениците
Со доаѓањето на постуденото време, сосема е природно да сакаме да ги заштитиме и нашите миленици. Изборот е голем од јакни, џемпери, дури и кучешки чевли. Но, многумина се прашуваат дали таквите работи се навистина неопходни или се каприц на сопственикот. И, ако е така, како да се избере вистинскиот модел во зависност од расата на кучето.
Прво што треба да се знае е дека не можат сите кучиња подеднакво да го издржат студот. Расите како што се хаска, акита, маламут, самојед и слични, имаат густо и долго крзно што ги штити од студот, па лесно можат да поминуваат часови надвор на многу ниски температури. Додека помалите кучиња и оние со кратко влакно како чивава, пинч, француски булдози и тн., нема да уживаат во долг престој надвор.
Важна е и возраста на кучето, односно на постарите кучиња потребна им е поголема заштита од кучињата кои се млади и полни со енергија.
Дали на вашето милениче му треба облека?
За да го дознаете ова следете го неговото однесување. Можно е да одбие да излезе или да брза да се врати во куќата, да се тресе додека сте надвор, а исто така проверете дали телото му е ладно на допир. Помалите кучиња веројатно ќе сакаат да ги носите во раце. Според некое непишано правило, штом температурата падне под 10 степени, време е за дополнителна заштита.
Суштината на облекувањето, е да се загрее кучето, да се заштити од дожд и да се движи слободно додека енадвор. Придобивка плус е што неговото крзно под оделото останува чисто, така што времето што го поминувате во чистење по прошетката е скратено.
Кога станува збор за кучешки чевли, тие имаат своја намена, но најдобро е да ги користите во текот на зимата. Потребата за овој „додаток“ се појавила најмногу во урбаните средини, кога работниците на патиштата ги посипуваат улиците со сол, што може да ја иритира кожата меѓу прстите, бидејќи се лепи за влакната, ја гризе кожата и на тој начин му создава проблем на вашето куче. Затоа е важно после секоја прошетка да ги избришете шепите на миленичето прво со влажна, а потоа со сува крпа, велат ветеринарите.
Избор на облека
При изборот на облека, погрижете се да нема шевови, висечки патенти, куки, копчиња или какви било додатоци што може да го повредат или иритираат вашето домашно милениче. Исто така тие се опасни, бидејќи милениците можат да ги џвакаат или проголтаат некои елементи.
Мерењето е уште една ставка на која треба да обрнете внимание. Оделото треба добро да му стои на кучето, да ја следи линијата на телото, но да не го стега и да не му пречи при движење. Најдобро е да го измерите миленичето од вратот до почетокот на опашката.
За дождливите денови и снег се препорачуваат кабаници или водоотпорни јакни, а за студени суви џемпери, или од памук или од волна.
Исто така, важно е да се обрне внимание на тоа како кучето се однесува кога ја носи облеката – ако се чеша, се обидува упорно да го соблече или посилно се трие, тоа значи дека не сте ја избрале вистинската.
