Зошто е важно да се направи дабл тест во бременоста?
Во првото тромесечие трудниците дознаваат за дабл тестот- кога се прави, поради што и кои се наредните чекори во случај на лоши резултати. Додека го чека своето бебе секоја идна мајка е пресреќна, но, во еден момент ќе се запраша „дали е сè во ред со моето бебе?“. Во бременоста одењето на редовни гинеколошки и ултразвучни прегледи е неопходно, а во морето нешта кои ќе ги научите во најубавиот период, е дека постојат тестови кои ви помагаат да дознаете дали, евентуално, постои некој проблем на кој не сте можеле да влијаете. Најважниот скриниг тест кој ќе го направите во тој период е дабл тестот.
Со овој тест се дознава дали бебето има некои хромозомски абнормалности, односно најчестите се трисомија 21 (Даунов синдром), трисомија 18 (Едвардсов синдром) и трисомија 13(Патау синдром).
Oвој тест се изведува во периодот од 11-14-та недела од бременоста, а најчесто во 12-та недела.
Дабл тестот е неинвазивен биохемиски тест за кој најважни се податоците од ултразвучниот преглед и параметрите добиени од крвната анализа на бременоста, која треба да се изврши во истиот ден кога и УЗ преглед или најдоцна до 48 часа по него. Доколку гинекологот забележи абнормалности кај бебето, ја испраќа трудницата на тест преку крв со кој се одредуваат free beta HCG – односно хуман хорион гонадотропин, како и PAPPA – pregnancy-associated plasma protein A.
Докторот ќе ја праша и за податоци, како килажа, дали боледува од шеќерна болест, дали е пушач, дали забременила природно или со ин витро, како и за возраста, параметри кои се важни при добивањето конечен резултат.
Што ако резултатите се лоши?
Резултатите се одредуваат според веројатноста. Ако, на пример параметрите за дабл тестот се 1:250, а добиениот резултат е 1:10 укажува на висок ризик, наспроти резултат од 1:10 000, што укажува на нисок ризик. Ако се добие резултат кој покажува на висок ризик од некоја трисомија, докторот ќе ја упати трудницата на дополнителни испитувања.
Процедурата може да биде и инвазивна, како што е амниоцинтезата, или неивазивна, како што е неинвазивен пренатален тест (NIPT).
Досега докажано е дека во 80 случаи дабл тестот е точен. Добра работа е што кога резултатите се лоши, тоа не е сигурен знак дека нешто не е во ред со бебето. Токму за тоа служат понатамошните тестови и процедури.
